باسبور

أغسطس 19, 2010 § أضف تعليق


باسبور وفاضي عشر سنين

لاسفرت ولا محتاج سفر

ولا قاعده نافعه ولا الرحيل

أنت المهاجر فالمكان

وأنت سفير عزرائيل

تقطع تذاكر بايته

راح يومها عليها

وفات معادها

يبعد مكانك عن زمانك

عن جيرانك

عن ماضيك

عن حلم كنت حلمته يوم

عن عين تدمع من الهموم

عن الالم

الاكتئاب

عن ذكرى عاشها حد غيرك

عن رعب المشاعر

عن وعنها كتير حاجات

بس انت تنسى ده يوم وكان

انت اللى حاضر

انت النفس

انت اللى لاسعك شمسها

وانت العقارب تك تك

وانت اللى قلبك تك تك

وانت العلامه فى ارض مليانه التراب

وانت اليقين بحقيقه شك

تقطع مسافه طويله حبه

تلقى اللى سيبته مش كتير

تلقاك شايلها دنيتك فوق الجبين

باسبور حياتى مش ورق

ولا هو تأشيرة موافقه

تعدى بيها فى الخريطه مابينها خط ونقطه مقطعين

ولا هو دبورة وسلاح

ولا هو دين

ولا هو شكل وبصمه واسم مكتوب مرتين

لا انا الهرم ولا برج بيزا

ولا الملامح

ولا اكل مسلوق او مشطشط

ولا اهلى عيشت بيهم التلاتين سنه

انا مش ورق مرسوم وفاضى

انا بس انا

ارمينى حتى بدون هدوم

فى صحرا كانت او بحور

انزع ضوافرك

وشدنى من كل منبت من شعورى

مش راح تاخدنى ولا تلاقينى

عاوز تكونى شيل دماغك

وازرع مكانها عقلى فص

ينبتنى فكره من جديد

وصل شرايينك لقلبى

تحس باللى بحس بيه

دلوقت بس تكون انا

مفاضلش غير يقبضها روحك ربنا

ويقبضنى روحى

ينفخها فيك

ساعتها بقى تنطق كلامى

تغنى لحنى فى لوحه لون

تصلى بيا لربنا

وفى ديسكو ترقصنى بجنون

باسبورى شفاف زى روح

لو تكتبه يبقى علامه لا حدوود

لا نهايه

ربك وخلقه للخلود

لو ترسمه خط ف لوحه

بس اللى رسمه مش انا

مرسوم بطفل

جنبه فيل ماسك قلم يرسم معاه

لو تسمعه مزيكا لحن

تسمعه جاى من بعيد

رايح بعيد

باسبورى مش اخصر بلونه

او نسر وفى ثانيه يطير

اه منها بس سجون بشر

فارضين قانون

ساجنينه حق بحجه انه دى افضل حلول

وان اللى حاكم دولته هو الرسول

مبعوث جنابه فى كل شقه

وشه ليك مرعب ونار والتانى للدنيا بعمار

البسمه والضحكه الرقيقه

كان مالى بس ومال ده كله

وان كان قدر انى اتولدت لقيتنى سجن

مش راح يكون مولدى سجن

ولو اتولد باسبور ورق

هاختار بقى نوع الورق

لونه وشكله

هختار له ختم بحبر لون

اسمه الموافقه

همسحها نقطه وخط من جوه الخريطه

انا عيشت حر سنين طويله

وكنت فاكر ان سجنى هو ده الدنيا ومافيها

لحد ما العمر ارتفع بدماغى فوق

مرسومه قضبان فوق ملامحى بالخطوط

اتارى دى شمس الشروق

مصطفى سليم

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

What’s this?

You are currently reading باسبور at Mostafa Sleem Art.

meta

%d مدونون معجبون بهذه: