عنين قزاز

يوليو 30, 2010 § أضف تعليق


فرانكو عربي على انجليزي لغات كتير

ودوشه جامده مرايه باهته كلام كبير

عنين قزاز تنكسر تكسر قلوب

وادين بتتكون بحريه

رفض المباح

وبدون سبب

وسبب يخليك ميت مباح

تملك عقول وتملكك

وقلوب تغني وتعجبك

وقلوب بتسكت تشغلك

وكأنك انت كل حد

كل شئ

حتة حجر

بندول فساعه

خيط فسبحه

جناح وطاير فالسما

سباح وعايم فالبحور

دخان بخور

قطر ماشي بكهربا

مسكين دماغه مقبره

وبفِكرُة مسنونله ساطور

شريان قلوب

يتصفى دمه زي نيل

لا يلاقي منبع يرشده

ولا حد طايق يشربه

وبفنه حتى بيلعبوا

مبسوط ومقتوله قتيل

بيعه وشروه

ولحمك اللي فوق عضامك

زي المخده عالسرير

تنتج ماتنتج نشتريك

غالي

رخيص

برضه انت رحت ولا جيت

فعنينا سلعه

ولو انت غالي عاليا حبه

برضه برضه هاشتريك

هابيع هدومي واشتريك

هاستلف دم واحسك

هاسرق قلوب واحب فيك

طب هيه فكره وجت فبالي

ولو ان ده صعب عليا

راح هاخلي ليا فيك شريك

نشتري ونبيع ونكسب

لو نخسر انت ملكش رأي

تزعل ما تزعل انت حر

انت المباع

احسن من الركنه فرفوف

وتراب يعشش فوق جبينك

وتنسد الودان

وتتغمى العيون

ويعدي يومك ايش تكون

انسان وبائس

يومك سنه

طعمك لمون

بيته ساكنه مش شبح

ساكنه الفراغ

مش الهوا

مش الكلام

مش التراب

الموت يبقى له معاني

يطلع بروح

طب وانت ايه معنى فحياتك

قدر تقول؟

ولا حتى لونك توصفه

ولا ريحه فيك

ولاجرح موجوع انت بيه

انت الفراغ والوهم والمعنى العقيم

انت المكسر اوالسليم

يابخت حد يلم روبابيكيا حياتك

يعملها شنطة

جزمه

صندوق فيه زباله

ورق مكرمش

يكتبك من تاني شعر

خام لفيلم

يرسمك سكه لطريق

يزرع ورودك جوه حوض

تنبتك من تاني عطر

ترجع يا آدم جنتك

وتعيش خلود

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

What’s this?

You are currently reading عنين قزاز at Mostafa Sleem Art.

meta

%d مدونون معجبون بهذه: